Euskararen eguna

Urriaren 31n eta azaroaren 1ean Karrika Euskara Taldeak eta Udalako Euskara Zerbitzuak Orreagako Gatazka taulara eraman zuten Euskararen Egunaren karietara egiten den jaialdiaren zazpigarren edizioan. Ikuskizunean ehun eta hogei bat agoizkok parte hartu zuten, eta denen artean gogora ekarri zuten 778. urtean Orreagaren ondoan gertatutakoa, alegia. Euskal Herriko historia osoko pasadizorik ezagunena eta bere garaian Europa osoan hain ospetsu egin gatazka hura.

Ikuskizunak iraun zuen ordu betean, istorioko protagonistak ikusi genituen: Carlo Magno eta bere ejertzitoa (50 lagunek osatua), Errolan iloba, Sulaiman Al-Arabi Zaragozako valia, eta noski baskoniak (ximenotarrak, belaskotarrak, banu-quasiarrak eta herri xehea), dena taldeak berak pentsatu eta idatzitako bertsioari jarraikiz. Antzerkiaren osagarri, beti bezala, dantza, argi efektuak eta koreografiak erabili ziren, eta aurten nobedade gisa, zuzeneko musika ere.

Ikuskizuna arrakastatsu gertatu zen; izan ere, taulara eramandako bi egunetan Kultur Etxeko aforoa osarik bete zen. Publikoaren erantzuna balio handikoa da dena euskara hutsean egiten dela kontuan hartuta.

Testua: Ekialde
Argazkiak: Kris eta Fran